لم يمهلوه

كنت مستني اصلي الفجر عشان اروح بعدها اصلي العيد .. بس طلبت معايا اريح عالسرير شويه و طبعا انتو عارفين الباقي

المهم صحيت علي اتصال من واحد صاحبي بيقولي مش هتروح تصلي العيد ولا ايه .. قلتله شويه و اعدي عليك .. عديت عليه قاللي اعدموا صدام

قلتله دلوقت ..؟؟

قالي من ساعه كده .. المهم صليت العيد .. و كنت بفكر في الموضوع ده طول السكه بعدها روحت قلت اقلب في المواقع ملقيتش حاجه و لما قلبت في المواقع الاجنبيه لقيت موقع السي ان ان عامل صوره لصدام مكتوب عليها صدام حسين 1937-2006 قلت خلاص اعدموه الاوساخ و بدات اقلب في باقي المواقع لقيت كلام متضارب عن اعدام برزان التكريتي او لأ لكن المؤكد فعليا هو اعدام صدام

بجد مزاجي اتعكر اول يوم العيد لأن المفهوم مش كوني بحب صدام او بكرهو

انا عموما مبكرهش صدام

لأن صدام زعيم عربي

ولو كان غلطان و لابد من محاكمته .. يبقي العرب اللي يحاكموه

امريكا تيجي لحد عندنا و تعدم زعيم عربي مننا و في مناسبه دينيه كمان اللي بيحرم فيها اصلا تنفيذ احكام الاعدام

او الكراهيه اللي بتصل للتحريم

ده يبقي معناه ايه

معناه واضح

امريكا بتقول للعرب

انتو تحت جزمتنا ....

ملهاش معني غير كده

رجعت بليل .. فتحت الكمبيوتر

وصلني كليب الاعدام ..

بدأ الكليب

صدام واقف .. راسخ ... ثابت و متماسك و رابط الجأش

بيعدل معهم الحبل .. قوي الشكيمه .. مش باين عليه الخوف

جسور في مواجهة الموت

بدأ يقول باعلي صوت

اشهد ان لا اله الا الله

و اشهد ان محمــ

لم يمهلوه ليكملها

ــــــــــــــــــــــــــــــــ

لا تدمع ايها العربي

تشبث بالله عز وجل

انتهت الاسطورة