الأحد، نوفمبر 12، 2006

خالف تعرف


المكان
قهوة الكرنك - شارع عبد السلام عارف - المنصورة
الزمان
السبت 11 نوفمبر 2006
الحدث
مباراة الاهلي و الصفاقسي في نهائي دوري ابطال افريقيا المؤهلة لكأس العالم للانديه
بصراحه مجاش في دماغي ابدا ان الاهلي ممكن يعلمها و يكسب
انا كنت مراهن علي صفر / صفر و كنت عارف ان الاهلي هيعمل ماتش حلو بس مش هيجيب اجوان
مش عشان هجومه ضعيف او حاجه لكن عشان انتو عارفين بقي التوانسه و الخطط الدفاعيه و تضييع الوقت و الخشونه و الاشتغالات الحمضانه دي و كنت قاعد طول الماتش عمال اشجع في القهوه و العمليه كانت والعه في القهوه و الشارع و البيوت و فرص تضيع و ايدين علي الراس و ايدين علي الافواه .. لحد ما فجأه عملها ابو تريكه
انا مصدقتش والله ان الكوره دخلت جول غير لما لقيته بيجري و اللعيبه بتجري - ما علينا ان القهوه و لعت و فيه واحد ركب فوقي و واحد معرفوش خدني بالحضن - قلت اكيد الحكم الخنيق هيعملها و يصفر يحسب اي اشتغاله منا بقيت متعود علي كده من اول الماتش لكن طلع فعلا جون يا جدعان و مبقيتش مصدق و الناس عملت رابطة تشجيع جوه القهوه و اهلاااي اهلاااااااي
المهم الماتش اتقلب و بدأ بقي لاعيبه تونس يلعبو بسرعه عشان يلحقو نفسهم بعد ما كانو بيضيعو وقت و جه اوت للاهلي فضل حسن مصطفي واقف سايب الكوره علي ما اللاعب التونسي يجري يجيبله الكوره و الناس في القهوه بيتصيح - روح هاتهاله يا بن الـ....ـ...ـه يا مـ....ص- و صفر الحكم و الماتش خلص و خد الاهلي البطوله
طبعا لما فتنا علي صاحبنا الزملكاوي اياه هو و اخوه طلع بعد فترة نقاهه لانه كان دمه محروق و كان محضر الكلام اللي هيقولو لينا لما نخسر لأنه عامل حسابه اننا خسرانين خسرانين لكن خد المفجأه العنيفه في بقو و بقي منهار نفسيا و ماشي مخنوق
المهم نزلناه قلنا نجيب العربيه و نطلع علي شارع المشايه اكيد العمليه والعه في شوارع المنصورة
طلعنا عالمشايه لقينا احتفالات و عربيات عليها علم الاهلي و بلاوي زرقا و الواد اتخنق اوي و قال والله لارجع اجيب علم الزمالك
رجع و غطا العربيه بعلم الزمالك و طلع تاني و بقينا عمالين نهرب من المطاردات اللي بتحصلنا و الناس بقت تزفنا علي طريقه - الحقو زملكاوي اهووووووووو
المهم نظريه خالف تعرف عملت مشاكل السما و الارض و بقينا الوحيدين في المنصورة اللي عاملين العمله السوده دي
اللي انا متاكد منو ان عساكر المرور الاهلاويه اكيد خدو النمر
ملحوظه
انا اهلاوي
ملحوظة اخري
محمد احمد بتاع العصير كان زحمه و معرفناش نجيب خروب
ما علينا

1 Comments:

At 3:07 ص, Blogger dead man said...

الله.. الوطن.. محمد أبو تريكة

 

إرسال تعليق

<< Home