وقعت قلبي يا راجل

طلبت معانا نفطر كلنا سوا - فرقة المسرح - طبعا انا كنت غني يومها و جيبي مليان و معايا 4 جنيه و نص بحالهم

المهم ان نص الناس خلعت بعد العصر بشويه مش عارف ليه بس اكيد لنفس السبب الشهير

المهم انا قررت اروح افطر معاهم ايا كانت العواقب .. اهو الواحد برضو بيحب اللمه

المهم كان شكلنا - الولاد - جميل جدا قدام البنات لاني اكتشفت ان مش انا الوحيد اللي بيعاني من ازمة مالية طاحنة

رحنا في الاول كوك دور نجيب المنيو و انا قريت المنيو مره واحده بس بعدها توجهت الي مؤمن لقيته ارحم شويه

طلعنا عشان نعد لكن البنات اعترضو لسبب غير مفهوم حتي هذه اللحظه

المهم نزلنا رحنا مطعم خرافي بس عيبه الوحيد ان مكانش فيه حد غيرنا

يعني لما رحنا كوك دور و مؤمن كانت الي مشكله - الي جانب الفلوس يعني - مشكله اننا مش لاقيين مكان ياخدنا كلنا

رحنا بقي المطعم المجهول غريب الاطوار ده

بس احقاقا للحق هو مطعم شيك و نضيف بس جو المطاعم منعدم جوه لأن مفيش غيرنا اساسا

المهم الراجل جاب المينيو و انا ببص عليها رحت مديها لمعتز قلتله شفلي حاجه علي زوقك لأني كنت عمال ابص علي السعر و بعدين امشي عيني علي السطر اشوف اللي جمب السعر ايه

مره يطلع فنجان قهوة و مره يطلع مهلبيه قلت اخلص من المينيو قبل ما يجيلي اكتئاب

المهم طلب مكرونه اسمها كده غريب مش عارف احفظوو رفعت قاللي تقريبا هنحاسب علي ازازة المية

اذا كان شرب المية هيروحني مشي.. يبقي بلاش ميه يا عم

المغرب اذن و الراجل نزل بالعصير

طبعا العصير نزل من هنا و كل واحد فينا بيبص للتاني كأننا بندور نفس الجملة في دماغنا

!!!!احنا مطلبناش عصييير ياااااااااااااااااااااااااااااااااااااااااا عم -

المهم قلت جايز من سلو المحل انو ينزل عصير في الفطار رحت دالق العصير في بقي لاني كنت عطشان جاز و بعدها نزل اكبر طبق مكرونه في العالم .. انا عموما حسيت اني لو بصيت علي طبق المكرونه هيخلص لأنهم كانو معلقتين تقريبا

ما علينا

طبعا بغض النظر عن الحرب الي اعلنتها بين الشوكه و المكرونه انا كنت يعني مستطعهما شويه و مش وحشه .. شغاله يعني و اللي كان مسهل العمليه ان مفيش حد في المطعم و اديها بقي اشي تعليقات علي افيهات علي مسخره

و لما نزل طبق المكرونه بتاعي لقيته منزلي طبق بطاطس مع اني مطلبتش بطاطس و الباقيين طلبو بس انا فاكر كويس اني قلتله مش عاوز بطاطس

طبعا انا بدل ما اتهور قلت اصبر جايز مش طبقي وبعدها جه الجرسون تاني عشان يعدل الخطأ اللي حصل لأنه كان طبق واحده من البنات و نزل غلط

قاللي انت طالب بطاطس قلتله لأ لألألألألأ

شاله من قدامي قلتله ايوه كده وقعت قلبي يا راجل !!!!

ما علينا تاني

العمليه كانت تهييس علمي واعتقد اننا لو كان معانا فلوس مكانش الموضوع هيبقي مهيس كده و ده اللي حلا القعده

كل ما الورطه تزيد كل ما التهييس و الافيهات تطلع و هو ده صميم نظرية ما علينا

ارحل ولا تعد