الحكاية من اولها

فاكرين زمان لما قلت اني مليش مزاج ارغي و احكي عن اللي فات

دلوقت انا ليا

سنة الولاده مهي معروفه طبعا كانت سنة 1984 و مين يجهلها ؟

و هنا في المنصورة و في توريل

مدرسة الاسلاميه كانت البداية بس الفكره كلها اني مش فاكر اي فلاشات من المرحله دي في حياتي

يمكن لاقط شويه ذكريات طشاش كده مش اوي

افتكر اني كنت في فصل فيه واحد معايا اسمو عفيفي

مش عارف ليه دي الحاجه الوحيده اللي فاكرها لكن مين عفيفي ده ؟

الله اعلم

افتكر طشاش برضو اني ابويا كان بيوديني بالعجله و في مره كنت نسيت البس فيها الطاقيه الصغيره بتاعتي و زعلت

انا بتكلم في ذكريات بقالها 18 سنه بس علي منا قادر اتذكر بحكي

اتنقلت مدرسة تانيه فتحت جديد سنة 1987 اسمها رعاية الطلبه

قعدت فيها لحد سنة اولي ابتدائي و تقريبا ضربت الفصل كلو لاني كنت بني ادم عدائي بس كنت بنضرب في الاخر لان كلهم كانو بيتلمو عليا و يضبطوني

انا فاكر اول يوم دخلت فيه المدرسه دي كانت كل العيال بتعيط و مش عاوزين يدخلو الفصل و انا الوحيد في المدرسه كلها اللي مكنتش بعيط و كنت عمال اتفرج عليهم و اتساءل هما بيعيطو ليه ؟

في سنة اولي ابتدائي اقدر اقول اني هفتكر الاحداث الاساسيه من غير طشاش

بس السنه دي مفيهاش احداث مثيره تستدعي اني افتكر كل التفاصيل لأنها كانت سنة روتينيه و مدرسه و بتاع

و بعدها سافرت مع ابويا رحت سلطنة عمان

العيله كلها من الاخر سافرت

خدت سنة تانيه ابتدائي هناك و بدأت اشوف النضافه

فعلا بلد نضيفه و فيها كميه مناظر طبيعيه تخلي اي واحد صعب اوي يسيب البلد دي و يرجع

طبعا حصلي مشاكل في المدرسه لاني مصري و طبعا المصريين بالنسبه لهم يعني الافلام و المسلسلات و طريقه الكلام المصريه و كل ما واحد يكلمني يعد يتمايع كأن اللهجه المصريه دي لهجه الفرافير فقط

كونت صداقات عديده و علي قد ما كان فيه نوع من السخريه من لهجتي بس هما بأمانه ناس طيبين جدااو انا حبيتهم لله في لله

اتصاحبت علي ابناء اصحاب ابويا المصريين و كانت علي فكره من اجمل ايام الطفوله بتاعتي هي ايام سلطنة عمان دي

انا رجعت منها بعد ما قضيت حوالي 3 سنوات رجعت مصر عشان ادرس 5 ابتدائي

و بداية من رجوعي مصر

بدأت الشخصيه تتكون

الموضوع ده هوضحو في الجزء التاني من

الحكايه من اولها