الثلاثاء، أكتوبر 10، 2006

العشر الأواخر


سلام عليكم
قربنا من العشره الاواخر في رمضان
النظريه اننا لما كنا سافرنا نعرض في القاهره مسرحية البيت الذي شيده سويفت ..عرضنا في المهرجان القومي للمسرح المصري و كان قدامنا لجنه تقيله و عملنا حاجه كويسه لكلية الاداب و لجامعة المنصورة عموما .. و لما رجعنا خدنا مكافات و كان المفروض اننا هنبقي المنتخب بتاع الجامعه , و المنتخب ده بيبقي عباره عن فرقة مسرح شامله بتمثل جامعة المنصورة و بيبقي فيها ممثلين من كل الكليات ..
و لما عملنا الانجاز بتاع المهرجان القومي كناعاوزين نبقي احنا المنتخب و نشتغل تاني النص بتاع سويفت و كان المنتخب كل سنه بيتكون من مجموعه ممثلين و مخرج معين كانو هما نفسهم نفس الناس اللي بيشتغلو كل سنه بالنسبه للكلام اللي وصلني يعني ...
و حصل ان ساعتها راح مننا وفد صغير لرعاية الشباب في جامعة المنصورة و كتبنا ورقه صغيره عبارة عن طلب او التماس اننا نبقي احنا فرقة المنتخب بتاع الجامعه و نعرض النص بتاع سويفت و بعد كده الموضوع اندفن شويه و نسيناه و كان المنتخب التقليدي بتاع كل سنه بقيادة نفس المخرج بدأو يشتغلو و يعملو بروفاتهم و كده و اتركنا احنا علي الرف..
نفضنا للموضوع لحد ما الدراسه بدأت و بدأنا احنا نعمل اسكتش جديد بيتعمل في المدرجات بس انا مش بشتغل مسرح في رمضان و منزلتش الكليه غير 3 او اربع مرات بس و بكده مشتغلتش في الاسكتش و في غبار الاحداث دي وصلنا اخبار من رعاية الشباب بتقول ان الورقه الهايفه اللي كنا قدمناها زمان في شهر سته اللي كانت التماس و صلت لرئيس الجامعه و ان رئيس الجامعه نزل فركش الشغل بتاع المنتخب و طلب ان فرقة اداب هي اللي تبقي المنتخب و نشتغل نص سويفت عشان ده نص جاهز طبعا كانت مفاجأه ساره من اوجه و غير سارة من اوجه تانيه - انا بتكلم بالنسبه ليا - ساره اننا هنتجمع تاني مع بعض زي زمان و هترجع الايام الجميله وكده و مش ساره من نواحي كتير اولهم اني مش بشتغل مسرح في رمضان و مش ضامن لو قلت الموضوع ده لمستر سعيد المخرج هيوافق علي كلامي ولا هيستغني عني ! خصوصا ان اول تجمع هيبقي يوم الاربعاء الجاي يعني بكرة بتاريخ الحادي عشر من اكتوبر الفين و سته الساعه 12 الظهر و طبعا انا هاجي التجمع عشان اعرف الموضوع هيرسي علي ايه و مشكله كمان بخلاف اني مش عاوز اشتغل في رمضان هي مشكلة نص سويفت نفسه لان دي هتبقي المره التالته اللي نشتغل فيها بروفات سويفت و مع احترامي للنص ده بس انا مش عارف ليه مش مبسوط !!
خصوصا اننا فعلا قربنا من العشره الاواخرو انا مش عاوز اقول اني شيخ او عامل فيها شيخ بس انا بجد فعلا عاوز اتفرغ للقرءان و الصلاه العباده و حياه الزهد .. عاوز ابعد شويه عن الحياه التقليديه !!!
اوعو حد يرد هههه