من اجل مصر

قرأت مقالة عن الراقصه الموقرة و واجهة مصر الحضارية الفنانه دينا

قالت دينا أن هؤلاء الذين يهاجمونها يضعون رؤسهم في الرمال ولا يريدون الاعتراف بالحقيقة وهي انها تؤدي دورا جليلا وعظيما لهذا البلد من خلال مشاركتها في حفلات الخارج بناء علي الدعوات التي تتلقاها سواء للمشاركة في حفلات ضخمة يحضرها كبار السياسيين والمسئولين والوزراء بالخارج أو من خلال المهرجانات الكبري بالاضافة لقيامها بالاشراف علي مدارس لتعليم بنات أوروبا الرقص الشرقي وبصريح العبارة كما تقول دينا: أنا سفير فوق العادة لمصر بالخارج والأجانب يأتون لمشاهدتي مثلما يشاهدون الأهرامات فنساء وبنات اوروبا وامريكا كما تقول يحضرن خصيصا لرؤيتها هى .

اصحو يا بشر .. شوفو الوطنية اللي علي حق

ايه يا بنتي انت وهي ؟ .. عماله تدرسي و تستني شهاده و تدوري علي شغل عشان تقبضي 200 جنيه و تبوسي ايدك وش و ضهر ... انت هبلة ؟

فين وسطك ؟... انت مش ليكي وسط ... مش ربنا خلق لك وسط ؟

و بعدين مصر يبقي شكلها ايه دلوقت قدام العالم لما يبقي دينا بس هي اللي شايله الرايه لواحدها

احفادنا يقولو علينا ايه ؟

متضيعيش وقت و شوفي اكل عيشك يا ماما

انا عن نفسي هتعلم اطبل

ما عليناااااااااااااااااااااااااااااااااااااااااااااااااااااااااااااااااااااااااااااااااا

خالف تعرف

المكان

قهوة الكرنك - شارع عبد السلام عارف - المنصورة

الزمان

السبت 11 نوفمبر 2006

الحدث

مباراة الاهلي و الصفاقسي في نهائي دوري ابطال افريقيا المؤهلة لكأس العالم للانديه

بصراحه مجاش في دماغي ابدا ان الاهلي ممكن يعلمها و يكسب

انا كنت مراهن علي صفر / صفر و كنت عارف ان الاهلي هيعمل ماتش حلو بس مش هيجيب اجوان

مش عشان هجومه ضعيف او حاجه لكن عشان انتو عارفين بقي التوانسه و الخطط الدفاعيه و تضييع الوقت و الخشونه و الاشتغالات الحمضانه دي و كنت قاعد طول الماتش عمال اشجع في القهوه و العمليه كانت والعه في القهوه و الشارع و البيوت و فرص تضيع و ايدين علي الراس و ايدين علي الافواه .. لحد ما فجأه عملها ابو تريكه

انا مصدقتش والله ان الكوره دخلت جول غير لما لقيته بيجري و اللعيبه بتجري - ما علينا ان القهوه و لعت و فيه واحد ركب فوقي و واحد معرفوش خدني بالحضن - قلت اكيد الحكم الخنيق هيعملها و يصفر يحسب اي اشتغاله منا بقيت متعود علي كده من اول الماتش لكن طلع فعلا جون يا جدعان و مبقيتش مصدق و الناس عملت رابطة تشجيع جوه القهوه و اهلاااي اهلاااااااي

المهم الماتش اتقلب و بدأ بقي لاعيبه تونس يلعبو بسرعه عشان يلحقو نفسهم بعد ما كانو بيضيعو وقت و جه اوت للاهلي فضل حسن مصطفي واقف سايب الكوره علي ما اللاعب التونسي يجري يجيبله الكوره و الناس في القهوه بيتصيح - روح هاتهاله يا بن الـ....ـ...ـه يا مـ....ص- و صفر الحكم و الماتش خلص و خد الاهلي البطوله

طبعا لما فتنا علي صاحبنا الزملكاوي اياه هو و اخوه طلع بعد فترة نقاهه لانه كان دمه محروق و كان محضر الكلام اللي هيقولو لينا لما نخسر لأنه عامل حسابه اننا خسرانين خسرانين لكن خد المفجأه العنيفه في بقو و بقي منهار نفسيا و ماشي مخنوق

المهم نزلناه قلنا نجيب العربيه و نطلع علي شارع المشايه اكيد العمليه والعه في شوارع المنصورة

طلعنا عالمشايه لقينا احتفالات و عربيات عليها علم الاهلي و بلاوي زرقا و الواد اتخنق اوي و قال والله لارجع اجيب علم الزمالك

رجع و غطا العربيه بعلم الزمالك و طلع تاني و بقينا عمالين نهرب من المطاردات اللي بتحصلنا و الناس بقت تزفنا علي طريقه - الحقو زملكاوي اهووووووووو

المهم نظريه خالف تعرف عملت مشاكل السما و الارض و بقينا الوحيدين في المنصورة اللي عاملين العمله السوده دي

اللي انا متاكد منو ان عساكر المرور الاهلاويه اكيد خدو النمر

ملحوظه

انا اهلاوي

ملحوظة اخري

محمد احمد بتاع العصير كان زحمه و معرفناش نجيب خروب

ما علينا

الملك الناقص

في المنصورة و في طريق جديله تقبع مدرسه معروفه اسمها مدرسة الملك الكامل الثانوية للبنين

المدرسه دي كان ابويا اشتغل فيها زمان قبل ما يبقي موجه

كنت دايما اتساءل عن سبب تسمية المدرسه دي بالاسم ده و مين هو الملك الكامل ده

لحد ما وقع في ايدي مره حاجه زي بوستر او ورقه كانت منشوره كملحق في جريدة الاهرام و كانت مكتوب فيها اسماء كل اللي حكمو مصر منذ فجر التاريخ و حتي الان و كانت ورقه ثمينه جدا كنت عاوز احتفظ بيها لكن للاسف ضاعت - اكيد اتغدينا عليها -و كنت قرأت اسم الملك الكامل من ضمن الاسماء اللي حكمت مصر في عصر الدولة الايوبيه و دي الدولة اللي اسسها الملك الناصر صلاح الدين الايوبي- من الشخصيات اللي بعشقها علي فكرة- لكن مكانش مكتوب عنه تفاصيل كان مكتوب بس فترة الحكم بتاعته و بعدها مجاش في دماغي الموضوع ده كتير لحد ما النهارده بس كنت بحضر محاضرة للمادة اللي عاجباني اللي اسمها تاريخ الفرق و المذاهب و تناول الدكتور فترة حكم الملك الكامل و لقيت انه -من كلام الدكتور- ملك خاين عمل بلاوي زرقا و تحالف مع الصليبيين و اعاد لهم القدس و حارب اخوه و حاجات كده عجيبه مينفعش تطلع من سلطان مسلم و اتقتل في الاخر و كان عليه معارضه عنيفه و معظم المسلمين ضد سياسته

و لما رجعت قلت اتصفحه الانترنت اعرف معلومات عنه و لفت انتباهي المقالة دي

يذكر التاريخ الإسلامي بكل تقدير وإعجاب نجاح صلاح الدين الأيوبي في استرداد بيت المقدس في يوم مبارك وافق ذكرى الإسراء والمعراج، في 27 من رجب 583هـ = 2 من أكتوبر 1187م ولم يكد يمضي على عودة مدينة القدس إلى أحضان المسلمين خمسة وثلاثون عامًا حتى كانت عرضة للمساومة والتفريط من قبل السلطان الكامل بن العادل الأيوبي سلطان مصر، في واحدة من أعجب التنازلات التي يقدم عليها حاكم مسلم حين تشتد به الأزمة، وتحيط به الملمات من كل جانب، فيقدم على عمل طائش، بعيد عن الحكمة والسداد، ويفرط في المقدسات التي لا يملك التصرف في أمرها شيئًا

هذا ما أقدم عليه السلطان الأيوبي قبل أن تسقط دمياط في يد الصليبيين في 27 من شعبان 616هـ = 5 نوفمبر 1219م في حملتهم الصليبية الخامسة على مصر، فعرض عليهم -بعد أن يئس من قدرة دمياط على الصمود – استعداده لإعادة بيت المقدس إليهم مقابل الجلاء عن مصرلكن هذا العرض السخي المفرط في التنازل لم يلق إجماعًا في قبوله من قبل الصليبيين فرفضوه؛ إذ كانوا يمنون أنفسهم بالاستيلاء على مصر، وظلوا في دمياط ثمانية عشر شهرًا كاملة دون تحرك جادٍ منهم، حتى تمكن المصريون من الانتصار عليهم وطردهم من دمياط، وفشلت الصفقة، ونجا بيت المقدس من المقايضة والوقوع في يد الصليبيين

و المقالة دي كمان

ساء موقف الإمبراطور فريدريك الثاني من تغير الأوضاع، ولم يبق له سوى سلاح المفاوضة والاستعطاف، لتحقيق الهدف الغالي والأمل المنشود؛ فأرسل سفارة إلى السلطان الكامل تحمل له هدايا نفيسة، وتطلب منه الوفاء بما تعهّد به للإمبراطور، وتسليم بيت المقدس له، وكان طبيعيًا أن يرفض السلطان الكامل هذا الطلب بعدما تبدلت الأحوال التي ألجأته إلى القيام بهذا العرض، غير أن رفض السلطان زاد من إصرار الإمبراطور على تكرار الطلب، والمبالغة في استمالة السلطان واستعطافه إلى حد التذلل والبكاء، وبلغ به الأمر إلى أنه كتب للسلطان الكامل في أثناء المفاوضات: "أنا مملوكك وعتيقك وليس لي عما تأمره خروج، وأنت تعلم أني أكبر ملوك البحر، وقد علم البابا والملوك باهتمامي وطلوعي، فإن رجعت خائبًا انكسرت حرمتي بينهم!… فإن رأى السلطان أن ينعم عليّ بقبضة البلد والزيارة، فيكون صدقة منه، ويرتفع رأسي بين ملوك البحر

أفلحت هذه السياسة وأثمرت استعطافات فريدريك في استمالة قلب السلطان الكامل، وكان رجلاً متسامحًا، ففرّط فيما لا يملكه، وتسامح فيما لا يجوز التسامح فيه، ووافق على تسليم بيت المقدس دون أن يبذل الإمبراطور في الاستيلاء عليه قطرة دم، أو ضربة سيف، أو طعنة رمح، وإنما فاز ببيت المقدس بدمعة عين، وخداع نفس، وحقق ما عجز عن تحقيقه ريتشارد قلب الأسد بجيوشه الضخمة وإمكانياته الكبيرة.
واتفق الفريقان على عقد اتفاقية يافا في (22 من ربيع الأول 626هـ = 18 من فبراير 1229م) بمقتضاها تقرر الصلح بين الطرفين لمدة عشر سنوات، على أن يأخذ الصليبيون بيت المقدس وبيت لحم والناصرة وصيدا.
ونصت المعاهدة على أن تبقى مدينة القدس على ما هي عليه، فلا يُجدّد سورها، وأن يظل الحرم بما يضمه من المسجد الأقصى وقبة الصخرة بأيدي المسلمين، وتُقام فيه الشعائر، ولا يدخله الفرنج إلا للزيارة فقط.
وبعد عقد الصلح اتجه فريدريك إلى بيت المقدس، فدخل المدينة المقدسة في (19 من ربيع الآخر 626هـ = 17 من مارس 1229م)، وفي اليوم التالي دخل كنيسة القيامة، ليُتوّج ملكًا على بيت المقدس

يعني الراجل متعبش في اي حاجه و لا مسك سكينه حتي و خد بيت المقدس كأنه بياخد كيس لب

دي المقالات اللي قريتها عن الموضوع و اللي اكدت كلام الدكتور و الكتاب بتاعه و دلوقت واحد زي الملك الناقص ده اللي يعتبر خاين و ضيع مجهود صلاح الدين العظيم بعد كل اللي استشهدو لاسترداد بيت المقدس جه الملك الناقص و ادهالهم تاني عن طيب خاطر

طب ليه يعني عاملين له تذكار و مسميين اسمه علي مدرسه .. اللي هي اصلا دار علم

لسه مش فاهم انا

و من ساعه ما عرفت الحوار ده وانا عمال اقول

ما عليناااااا

يخلوك تكرهو

عمر خيرت

واحد من افضل الموسيقين اللي ظهرو في تاريخ الفن المصري المعاصر

و من الناس اللي الموسيقي بتاعتهم بتتكلم و متحسش انها محتاجه معاها غناء او صوت بشري لأن هي لوحدها بتحمل معني و عمق فكري

من اكتر الحاجات اللي خلت معظم الناس لا تميل كثيرا للاحتفاء بالراجل اللي مش واخد حقو في مصر

هي عرض الموسيقي بتاعته دايما في اطار يخيلك فعلا تكرهو

و خير مثال علي ده

القنوات الارضيه المصريه

و ده كان مخليني بكره الموسيقي بتاعه لفترات طويله في حياتي خاصة ايام الطفوله لأنها مرتبطه دايما في دماغي بالبرامج الممله بنت الكلب اللي بتتعرض علي القناة الاولي و التانيه و تلاقي برنامج خنيييييييق يجيب السل و الايدز و باديء بموسيقي عمر خيرت و الامثله كتير

دور كده علي اي برنامج مهبب و ممل من برامج القناة الاولي تحديدا لانها مميزه في الملل

هتلاقي دايما يجبك موسيقي عمر خيرت في الاعلانات اللي عباره عن سطور كلام وواحد بيقرا - الاعلانات ام 100 جنيه الاعلان - و شغال وراه موسيقي عمر خيرت

يعني شيء طبيعي جدا انك لازم هتكرهو

لكن لما بدأت افهم في الموسيقي وفي الفن و السينما بدأت نظرتي تتغير و بدأت اخد بالي من روعه و عذوبة الالحان و اخد بالي اكتر ان الراجل ده مظلوم في البلد دي و كفايه العقاب الازلي اللي اتوقع عليه

ان شغله يتعرض في القناة الاولي و التانيه في البرامج الخلابه اللي بيعرضوها

عندك مقطوعات زي :

العرافه و العطور الساحره

قضية عم احمد

غوايش

البخيل و انا

لابد من يوم محتوم

دي بعض الروائع اللي لازم تتسمع

يلا هروح اضرب خروب