الاثنين، يونيو 18، 2007

اكتشاف

سلام عليكم
نخش في الموضوع علي طول
الشخص اللي مش بيكون مر بتجربه عاطفيه او مش بيجيله احساس الميول لفتاه معينه ... يعني انه يحب واحده من الاخر .. بيكون غالبا حاطط مواصفات لشريكة حياته - اللي هي اصلا مش موجوده لسه - و بيبدأ انه يدور علي الشخصيه اللي فيها المواصفات دي .. ده اذا كان اصلا شاغل نفسه بالموضوع ده لأن الشخص ده بيكون علي الارجح مش واجع دماغه بالموضوع ده و سايب الايام هي اللي تديله اجابه .. لكن لما يقع الشخص ده في حب فتاه معينه بيكتشف حاجه مكانش واخد باله منها ..
ان الميول او العاطفه اللي عنده دي بتكون مالهاش اي علاقه بالمواصفات اللي كان حاططها .. و ممكن تكون الفتاه اللي بيحبها دي فيها مواصفات مضاده تماما للي هو عاوزو .. لكن مش قادر يتخيل نفسه هيتجوز بواحده غيرها !!
طب ده يبقي ايه ..!!
ده يثبت ان العاطفه دي مالهاش تفسير نفسي محدد .. بتبقي حاجه كده بيولوجيه .. صعب تحديد مصدرها و بتيجي ازاي وليه .. يعني محدش يقدر يقول انه بيحبها عشان كزا و كزا و كزا ...
اللي بيحب واحده بجد ... اسأله و قولو بتحبها ليه ؟
هيقولك : مش عارف .. والله معرف ..
ده تعرف انه بيحبها ... مش مجرد بعض الاسباب خلته يقرب منها ...
و ده الاكتشاف الاخير اللي اكشتفته الفتره اللي فاتت
انتظروني مع مزيد من الاكتشافات .. مع برنامجكم المفضل ... انعدام الوزن
محمد اسامه
اشرب الخروب يا سيدي