فرق كبير

الساحه الغنائيه في اي مكان من المعروف عنها انها لا تعتبر الهواه متواجدين و لا تعترف بهم الا اذا كانو متعاقدين مع شركات انتاج و بينزلو شرايط كاسيت او سيديهات و كليبات و , , , الخ . و من خلال الزاويه دي عاوز اوضح الفرق بين الرابر الاندرجراوند و الرابر الابجراوند ..
بس فيه ملحوظه . المقارنه دي ساريه التطبيق علي اي نوع من المطربين مش بس الرابرز .. بس انا بتكلم عن الرابرز لأن مجالي هو الراب
طبعا فيه فروق كتير جدا .. بس انا هقارن من عدة نواحي
اول حاجه
الشهره
طبعا الشهره كعامل مقارنه اكيد بيصب في مصلحه الرابر الابجراوند و ده لاسباب كتير اولها ان الاعلام معاه .. و الاعلام ده سلاح خارق يقدر يوصل جوه بيتك و يدخل اودة نومك غصبا عنك وده طبعا زي التلفزيون و الفضائيات و الانترنت و شرايط الكاسيت و السيديهات و....و.... الخ . و كقايه التلفزيون .. لكن الرابر الاندرجراوند مش بيكون حيلته من وسائل الاعلام غير الانترنت كسلاح بسيط يقدر من خلاله يقول انا موجود و يقدر يعمل لنفسه جمهور من خلال الانترنت و تقريبا مفيش وسائل تانيه بنفس قوة الانترنت اللي ممكن توصله للشهره . ويمكن نغمات الموبايل تكون عامل لكنه عامل بسيط لا يذكر و احيانا الحفلات لو كان بينظم حفلات .. و بالتالي الرابر الاندر جراوند الناس هو اللي بيدور عالناس و يقولهم انا موجود مش الناس اللي بتدور عليه و بعد كده لما بيعمل لنفسه اسم يقدر انه يشتغل بثقه ..
الامكانيات
و ده تاني عامل برضه بيصب في مصلحة الرابر الاب جراوند لأنه مش مطلوب منه يعمل مزيكا ولا يهندس الصوت ولا يعمل اي حاجه اصلا في حياته غير انه يألف و يغني .. و ممكن كمان ميألفش الشركه المنتجه ممكن تجيب له ناس تألف له .. ده غير تنظيم الحفلات و غير طبعا امكانيات الاستديوهات اللي بيسجل فيها .. يعني امكانيات خرافيه ممكن يعمل بيها اللي هو عاوزو في حياته ..نيجي للرابر الاندر جراوند هنلاقي ايه ! .. طبعا اعتماده كله علي نفسه في كل حاجه ده في حاله ان جيبه فاضي .. لكن ممكن رابر اندرجراوند يبقي جيبه مليان و يصرف علي هوايته لكن النوعيه قليله لسبب بسيط انه لو معاه فلوس كتير تخليه يعمل شغل بامكانيات حلوة .. مش هيدوم كرابر اندر جرواند و علي طول هتلاقيه ظهر الساحه لأن كلو بالفلوس .. ولا فيه حد مش متفق معايا في كده ؟
الرابر كفنان بيغني .. مش مطلوب منه يعمل مزيكا ..مطلوب منه يغني بس ... لكن الرابر الاندر جرواند بالذات لازم يعمل مزيكتو بنفسه ميجيبش مزيكا جاهزه لأنه ميقدرش يغني علي مزيكا جاهزه جايبها من اي موقع و يطلب من الناس ان محدش يغني عليه تاني !! ده تصرف ملوش معني لأن البيتس دي متداوله في كل حته و هو ملوش صلاحيات انه يغني عليها و يقول محدش يغني عليها غيري و بالطريقه دي هتحصل مشاكل و تلاقي كزا رابر اندر جراوند مغنيين علي نفس البيت !! طبعا مهو بيت موجود و اللي عاوزو ينزلو ... لكن لو كل رابر اجتهد و حاول انه يعمل لنفسو مزيكا خاصه بيه .. حتي مش لازم يكون هو اللي بيعملها بس عالاقل ناس تعملو المزيكا و تكون ناس اندر جراوند زيو بالضبط عشان يبقي هو اللي له الصلاحيه انه يغني و محدش يغني تاني علي مزيكتو عشان لأن محدش م هيعرف يجيبها اصلا !
الموهبه ..
و ده اول عامل يصب في مصلحه الرابر الاندر جراوند ..لانه الرابر الاندر جرواند مش من السهل انه يعمل لنفسه اسم و شهره ولو بسيطه من غير وجود موهبه حقيقيه قدرت تفرض نفسها و تخلي الناس تسمعها .. و اتحدي ان فيه رابر اندر جراوند مستواه و حش و قدر يستمر .. الحلو و الوحش في الاندر جرواند بيبان لأن هنا مفيش فلوس و مفيش وسايط و مفيش اصلا وسط تقدر من خلاله انك تفرض نفسك علي حد .. الشغل الجامد بس هو اللي بيفرض نفسه و بيفرض استمراريته .. لكن في الوسط الفني و الرابر الاب جراوند .. غصبا عن اي حد هيتسمر حتي لو ملوش فيها .. و كلو بالفلوس .. و طبعا مش محتاج اشرح اكتر من كده اكيد اللي بيقرأ فاهمني ..
الحرية
الاندرجراوند رابر بيتمتع بحريه خارقه في كلامه و اغانيه و موضوعاته لان مفيش رقابه مصنفات فنيه ولا حد بيقولو لأ مينفعش و لا هيترفع عليه قضايا و لا حد هييجي جنبه لأنه مش مطرب رسمي تابع لشركة انتاج معينه .. عشان كده في الراب الاندر جراوند توقع انك تسمع اي حاجه في اي وقت .. ممكن تسمع شتايم قبيحه و ممكن تسمع كلام جريء في السياسه و ممكن تسمع كلام في الجنس و ....و .... الخ يعني حريه بلا حدود و مفيش قيود علي اي حاجه و طبعا كل رابر اندر جرواند بيكون باين سكته و اسلوبه و بيختار لنفسه طريق معين بيبقي معروف بيه و جمهوره بيعرفوه بيه ...
نيجي للرابر الابجراوند نلاقي فرق شاسع .. و خصوصا في مصر تلاقي طبعا مضطر يتحاشا الكلام في موضوعات كتير اهمها السياسه و خصوصا السياسه الداخليه للحكومه المصريه و النظام المصري لأنه حتي لو عاوز يتكلم عنها الشركه هتقيده و هتفرض عليه شروط في اختيار موضوعاته .. يعني هنا بيبقي فيه نوع من القمع الفني عليه كرابر من حقه يتكلم في اي موضوع هو عاوزو ...
المميزات
مميزات الراب الاندرجرواند .. هو عاملين من العوامل اللي فاتت هي الحريه المطلقه و الموهبه ..لأن الرابر الاندر جرواند ممكن في اي وقت يعمل اغنيه وينزلها و ممكن يعد سنه مينزلش اغاني و ممكن ينزل خمسين اغنيه في شهر واحد .. يعني مش بتفرق الزمنيات معاه في حاجه .. لأنه مش متربط بعقد و لاحد له عنده حاجه .. يغني وفت ما يغني و يبطل وقت ميبطل براحته ... و من مميزات الراب الاندرجراوند كمان انه قريب من الناس و عامه الشعب .. لان اللي بيتكلم ده واحد منهم مش واحد بيه او باشا عايش في وسط غير الوسط بتاعهم .. عشان كده تلاقي المصداقيه عاليه جدا في الراب الاندر جراوند ....
الرابر الاب جراوند مميزاته مالهاش حصر و كفايه الاعلام .. اللي هيشهرو في اي حته غصبا عنو .. و كفايه ان الناس كلها تبقي عارفه شكلو و هيئته عكس الاندر جراوند و طبعا الامكانيات و الاستديوهات .. و الحفلات ... الخ .. بالاضافه لانه هيبقي له حقوق ملكيه في اغانيه و شغله و محدش يقدر يتعدي عليها ..
العيوب
عيوب الاندر جراوند اولها ان الحقوق ساعات بتضيع وممكن رابر ابجراوند يسرق اغنيه من رابر اندر جراوند و ده ميعرفش يعملو حاجه لأنه محدش يعرفو و محدش هيصدقو .. يعني محدش بيحمي الرابرز الاندر جراوند .. و كمان الاندرجراوند ممكن بتسمع في اي حته و محدش يعرف ده مين !.. و ممكن يتظلم في حاجات هو تعب فيها ... لكن مفيش قدامه غير انه يغني لانه بيحب يغني .. هيعمل ايه يعني !!
الاب جراوند عند مشكله جامده في القمع الفني اللي انا اتكلمت عليه .. زائد انه مضطر ينافق في حاجات كتير زي كل الفنانين طبعا .. لانه مش هيقدر يقول رأيه بصراحه في شخصيه معينه او مطرب معين غير بكل خير .. حتي لو هو من جواه مش طايقه .. و بيبقي شخص مثالي زياده عن اللزوم .. تحت شعار انه يكون قدوة للجمهور .. و طبعا كل دي قيود مش بتديله الحريه اللي موجوده عند الرابر الاندر جراوند ...
و بكده انا تقريبا خلصت الكلام اللي عندي في الموضوع ده .. و يمكن اكتشف نقط تانيه اضيفها لكن ده اللي كان حاضر في ذهني دلوقت

بقالي كتير اوي مشربتش خروب