رمضان كريم

رمضان كريم يا شباب
طبعا الدراسه بدأت و انا معتبتش محضرة لسه لحد دلوقت و مقضيها تهييس و من اداب علي الجامعه و السنتر و خلافه
بس مع بداية شهر رمضان لغيت حوار الكليه ده عشان رمضان بحب ابقي مختلي بنفسي شويه اهو الواحد صايم و مينفعش بقي كلية و اختلاط و بنات و خلافه .. بس رمضان بالنسبه ليا بصراحة بيبقي شكل تاني ..
اليوم عندي بيبقي منقسم الي صلوات في المسجد و قراءة قران و او قراءة كتب في البيت و اخر عشر ايام بقي ان شاء الله هحاول اعتكف في المسجد عشان لو مكنتش ختمت القران ابقي اختمو
و البعد عن الفن علي فكره و الراب بيبقي له فايده كبيره هي تجميع الافكار ... يعني الواحد لما يبعد عن هوايته فتره بيرجعلها و هو ذهنه صافي و مش مشحون لسه بتجارب سابقة و بيكون عنده افكار جديده و هكذا
طبعا البلوج ده محدش يعرف عنه اي حاجه و انا مش هنشره علي فكره اللي عاوز يرد يرد بقي هههههه

يلا سلامز

مودي راب

انا مين

انا اسمي محمد اسامه.. شهرتي مودي راب

ده الاسم اللي كنت اخترته لنفسي لما بدأت في عالم موسيقي الراب

بدأت اسجل اغانيا سنة 2001 و كانت اغنيه اسمها مقاطيع الشارع ..

بحب دايما ابدأ بكلامي من اللحظه اللي انا فيها .. عشان اللي فات خلاص خلص و مش بحب احكي عنه كتير .. جايز مع الوقت اتكلم عن اللي فات لما يستع صدري للكلام

عاوز اقول اني مع الوقت و مع مرور حوالي 7 سنوات زادت خبرتي في جوانب العالم ده

و بما اني عايش في مدينه المنصورة رغم انها مدينة الفن و الفنانين ألا ان اللون ده بالذات من الموسيقي كان صعب الاقيه متوافر فيها و كان من الصعب جدا الاقي اللي يساعدني في هوايتي ..

بدأت اتعلم ازاي اعمل كل حاجه بنفسي .. و دلوقت وصلت لمرحلة اني من الصعب اني مكونش مشارك في كل حاجه بنفسي رغم اني في الاول كنت ببحث عن من يساعدني و يضع موهبته علي موهبتي ..

انا دلوقت بألف و بلحن و بغني صولو و بغني راب و بوزع الموسيقي و بسجل صوت و بعمل مكساج ..!!!

كل ده مع المران و التعليم و التكرار و القعاد قدام الكمبيوتر علي البرامج ليل نهار عشان اتعلم .. اتعلم من ايه ؟؟ من المران بس !!

انا مش دارس للموسيقي .. لكن بعرف اوزع .. معرفش ازاي .. بس ده اللي بيحصل

طبعا الكلام كترو الناس زهقت .. و من حقكو تسمعو

ده رابط الموقع بتاعي

www.uglymody.jeeran.com

و عشان اسهلها عليكو ده رابط اخر البوم انا عملته و الالبوم بعنوان - جندي

http://uglymody.jeeran.com/gondy.html

انا بحب الراب لانه الراب هو الكلام .. عارفين يعني ايه الكلام ؟!!

لما الكلام يوصل لمرحله انه يكون فن .. ده بيكون اكيد نوع من الادب .. لكن لما يبقي علي صوره موسيقي ده اكيد حاجه جديده و حاجه لازم يبقي فيها تمعن ..

انا مش برص كلام علي الرتم كده و خلاص و اعد اتنطط علي المسرح .. انا بقول كلام انا فاهمو و حاسو ..

لو كنت بتكلم عن نفسي . فده في اطار اني واحد من الناس و ان مشاكلي ممكن تكون مشاكل القطاع الاكبر من شباب مصر

بتكلم عن فلسفتي و عن وجهة نظري في الحياه .. و اللي انا شايفه صح و اللي انا شايفه غلط

بلاقي في الهوايه دي افراغ لكل الكبت اللي انا فيه ..

كل حاجه

مفيش حدود

و في الاخر انا مجرد واحد منكو .. مش واحد من الشباب .. لأ

واحد من البني ادمين اللي في البلد دي