السبت، مارس 17، 2007

عاوز احكي




طب والله عاوز احكي
بس مينفعش

انا لما عملت المدونة دي كنت عاملها عشان اصلا احكي و افضفض براحتي من غير ما اكون مقيد
بس الموضوع ده نحديدا مش عارف احكيه
و يمكن تكون المدونة دي اخر مكان ممكن اني احكي فيه الموضوع ده لاني مش عاوز حد يعرفه لأنه لسه موضوع
مش مؤكد
فاكرين البوست اللي كان بعنوان تخاطر العقول؟
اهو ده بقي نفس الموضوع
و علي فكره انا و صاحبي تاني يوم علي طول
عدا عليا عشان نتكلم
و اتكلمنا
و كشفنا الورق كلو قدام بعض و كل واحد عرف حوار التاني كويس اوي
و نفسي والله احكي
بس اعمل ايه
ده انا حتي مليش مزاج اضرب خروب
شفتو الموضوع وصل لايه ؟
و حتي مش قادر المح و لا ادي للموضوع اي عمق و لا اطار تخيلي و هسيب الناس تتخيل للصبح
و هقوم اشرب شاي عشان احتمال اخبط كمان بوست دلوقت
بس مش هحكي الموضوع اياه برضو

او
او


مخلاص بقي انت هتصاحبني

الأربعاء، مارس 14، 2007

قرار علي الحافة




مش عارف

بحاول اقنع نفسي اني زهقت من الراب
و ارجع اقول لأ
معقول هبطل ؟
بعد مشوار 6 سنين بغني راب و مقضيها و مولعها؟
بس اللي مخليني بدات اتخنق .. هي المنظومة نفسها
منظومة الراب المصري
مفككة و مش واضحة المعالم
و اكتشفت ان قمة الغلط .. اني فكرت اندمج و انفتح علي العالم ده
و خرجت من العزلة اللي كنت فيها
و بدات المشاكل
اكتشفت ان الوسط ده مليان بالعالم التافهه و ناس داخله لمجرد انها تشتغل ناس تانيه و حاجه تقرف
و قررت من فتره قريبه اني ارجع تاني لحالة العزله
و فعلا عملت ايميل تاني مخصص لصحابي بس و من غير اي حد له علاقه بالراب من قريب او بعيد.. لان ايميلي الاصلي بقي مليان بعدد مهول من السميعه و الرابريه و انا عاوز ابعد عن الحوار ده شويه خصوصا اني بقيت مش بعمل اغاني عشان استمتع لأ.. ده انا وصلت لمرحلة اني بعمل اغاني عشان انجز قبل ما غيري ينزل
طب ده كلام !!!
و انا مالي و مال غيري .. ما اللي ينزل اغاني ينزل .. المهم انا ابقي عامل الدماغ التقيله بتاعتي و بشرب الخروب بتاعي و االف وانا مزاجي عالي ..
و اللي يغني يغني .. و اللي يسمع يسمع .. ايزي يعني
و الحقيقه القرار ده مريحني بقاله فتره .. و مخليني خرجت من حاله الخنقه اللي كنت فيها ... لأني معنتش بقي بسمع تقييمات الاخوة الافاضل اللي كل واحد فيهم حاططني في دماغه و عمال يقيم كل خطوة اعملها

المهم
القرار اللي علي الحافه فعلا
هو اني اخلص الالبوم اللي جاي ده و انزلو


و ابطل راب خالص

و بدرس القرار ده
و المرة دي بجد




- صوت واحد بيشفط بؤ خروب -